Monday 17th June 2019
  • New title for a=>html, img=>alt
  • गुगल वर्ष

    -

    May 17, 2019 | 76 Views


    प्रेम राई ‘परिक्षित’

    साथी सहरमा
    नयाँ वर्ष हैन
    आज गुगलवर्ष मनाइदैछ
    ग्राफिक डिजाईनका
    सुन्दर कलाहरुले
    फेसबुकका भित्ताहरु
    बिहानैदेखि रङ्गाइदैछ
    अनलाईनका
    मनोहर जिफ जिफि र स्टिकरहरुले
    म्यासेन्जरका पानाहरु सजाइदैछ
    लाग्छ साथी
    आज नयाँ वर्ष हैन
    गुगल वर्ष मनाइदैछ

    थाह छैन साथी
    मान्छेको दैनिकी बदलिन्छ बदलिदैन ?
    यी औपचारिकताका
    शुभकामनाहरुले
    मनको बिकारहरु बग्छ कि बग्दैन ?
    यी रङ्गिन स्टिकरहरुले
    जे होस
    मैले नि गुगल सर्च गर्दै
    तिमीलाई शुभकामनाको
    एउटा स्टिकर पोष्ट्याई दिएँ
    मलाई थाह छैन
    तिम्रो प्रतिक्रिया के हुनेछ
    बस्, मैले नि संस्कृती पछ्याई दिएँ

    हेर्नुछ अर्को वर्ष
    मेरो शुभकामनाको प्रगति तिमीमा
    आफ्नै आँखा अगाडि
    रुपान्तरित तिम्रा दैनिकीहरु
    अनुभूत गर्नुछ मैले
    तिम्रो
    हिजो
    आज
    अनि भोलि
    मेरो शुभकामनाका स्टिकर जस्तै
    एप्सको भर्सन जस्तै
    परिबर्तित हुन्छ हुदैन ?
    मेरो गुगलका शुभकामनाले
    तिम्रो जीवनको तात्विक्तामा
    थोरै अन्तर पर्छ पर्दैन?

    जे होस्
    नव वर्षको दिन
    गोश्वारा हुलाक बन्द छ आज
    तिमीलाई चिठी पठाउन सकिन
    अरुको सिको गर्दै
    जानी नजानी एउटा स्टिकर
    गुगल दाइको हातमा
    थमाईदिएको छु
    शुभकामना छ तिमीलाई
    नव वर्षको !
    पाए पछि मलाई नि
    गुगल दाईको हात लगाईदिनु
    तिम्रा शुभकामनाहरु

    साथी
    हुलाक भए पैसा लाग्थ्यो
    तर गुगल दाई
    धेरै मायालु हुनुहुन्छ
    सबै काम गर्दिनु हुन्छ बिना पैसा
    बस्
    मात्र पन्ध्र सोह्र हजारको
    मोबाईल र इन्टर्नेट जोहो गर
    यति भए
    हाम्रो नव वर्ष अरुको जस्तै
    शानदार हुनेछ
    हाम्रो शीर ठाडो भएर बाच्नेछ
    जोरिपारिको अगाडि

    ( कवि समसामयिक धारामा कलम चलाउने स्रष्टा हुन । नेपाली साहित्यका विविध विधामा कलम चलाउने राईको कविता कृति प्रकाशनको तयारीमा रहेको छ । उनी पेशाले शिक्षक भएपनि साहित्य उनको रुचि र शोखको विषय हो )